ہندوستان کی لسانی تہذیبیں ، مـضمو ن نگار :علی رفاد فتیحی

اردو دنیا،جولائی2026:

ہندوستان میں ہند آریائی، دراوڑ، منڈا اور تبتی برمی خاندان کی زبانیں بولی جاتی ہیں۔ یعنی ان لسانی خاندان میں سے ہر خاندان میں کئی کئی بولیاں اور زبانیں شامل ہیں، جیسے ہندی، اردو، پنجابی، سندھی، گجراتی ، مراٹھی، بنگالی وغیرہ ہند آریائی خاندان کی زبانیں ہیں جب کہ ملیالم، کنڑ ، تلگو اور تمل دراوڑ خاندان کی زبانیں ہیں۔ اسی طرح سنتھالی ، منڈاری، ہو وغیرہ منڈا خاندان کی زبانیں ہیں ۔ تبتی برمی زبانوں کے خاندان میں بوڈو، منی پوری ، قابل ذکر بولیاں ہیں۔
قدیم دراویدی تہذیب
دراویدی تہذیب کی ابتدا موہن جو داڑو، سندھ اور پنجاب کی قبل آریائی تہذیب اور قدیم تمل ادب سے ہوتی ہے۔ موہن جو داڑو اور ہڑپارسم الخط مغربی اور ہندوستانی براہمی سے اس کی مشابہت ، دراویدی تہذیب کی عظمت کا احساس دلاتی ہیں۔ سندھ اور جنوبی پنجاب کی تہذیب اور دراویدی بولنے والوں سے اس کا امکانی تعلق اس بات کا ثبوت ہے کہ دراویدی تہذیب ایک قدیم تہذیب ہے۔ یہ ایک حقیقت ہے کہ آریائی اور دراویدی طور طریقوں میں تخالف کا پہلو نمایاں ہے۔ لسانی سطح پر بھی آریائی اور دراویدی زبانوں میں نمایاں فرق ہے کیونکہ دراویدی زبانوں کا تعلق دراویدی لسانی خاندان سے ہے۔ جب کہ ہندوستان کی آریائی زبانوں کا تعلق ہند آریائی خاندان سے ہے۔ یہ فرق آریاؤں اور در اودوں کے تصادم کا سبب بھی بنتا رہا۔ ان سب کے باوجود ہند آریائی زبانوں نے دراویدی زبانوں کے لسانی اثرات کو قبول کیا اور دراویدی زبانوں کے زیر اثر اس میں کئی ایسی لسانی خصوصیات پیدا ہو گئیں جو دراویدی تھیں۔ مثلاً آریائی زبانوں میں معکوسی آوازوں کا استعمال غالباً دراویدی اثرات کا ہی نتیجہ ہے۔ ہندوستان میں آریاؤں کی آمد سے پہلے آریائی زبانوں میں معکوسی آوازوں کا استعمال نہیں ملتا۔ مثال کے طور پر فارسی میں معکوسی آوازیں مستعمل نہیں ہیں ۔ آریاؤں کی مقدس کتاب ’رگ وید‘ میں بھی معکوسی آوازوں کا استعمال برائے نام ملتا ہے۔ اس سے اندازہ ہوتا ہے کہ ہند آریائی زبانوں میں معکوسی آوازوں کا استعمال دراویدی زبانوں کے زیر اثر شروع ہوا۔
آسٹرک تہذیب (منڈ السانی خاندان)
آریاؤں کی آمد کے وقت منڈا لوگ سادہ زندگی بسر کرتے تھے۔ چھوٹی چھوٹی بستیوں میں رہتے اور معمولی کاشت کاری کرتے تھے۔ ان کے یہاں خیر وشر کے الگ الگ دیوتا تھے، پتھر کے ٹکڑے یا بھونڈی شکلیں ان کا مظہر تھیں ۔ وہ قربانی کے جانوروں کا خون یا اس کے بدلے سیندور یا کوئی دوسرا سرخ رنگ ان پر چھڑکتے تھے ۔ سماج اپنی ابتدائی حالت میں تھا۔ اشیا کی افراط تھی۔ ان حالات میں ان لوگوں میں (جس کا اندازہ بعد کے ہندوستانی مزاج کی خصوصیات سے ہوتا ہے ) ایک خاص انداز کی رواداری پیدا ہوگئی تھی اور ’جیو اور جینے دو‘ کا فلسفہ عام طور پر تسلیم کیا جاتا تھا۔ اس نسل کے لوگ جنھیں عام طور سے ’ آدی واسی‘ کہا جاتا ہے ، آج بھی جھارکھنڈ اور چھتیس گڑھ کے علاقے میں رہتے ہیں اور منڈ السانی خاندان کی زبانیں بولتے ہیں۔
تبتی برمی تہذیب
دراویدی بولنے والے داس دسیو (Dasa-Dasyu) اور منڈا لسانی خاندان کی زبانیں بولنے والے نشاد (Nisada) لوگوں کے علاوہ آریاؤں کو کوہ ہمالہ کے خطے میں اور شاید ہندوستان کے مشرقی علاقوں میں منگول تبتی ، چینی بولنے والوں کا بھی سامنا کرنا پڑا۔ ویدی عہد سے ہی آریا ان کو کرات (Kiratas) کہتے تھے ۔ ایک عام خیال یہ ہے کہ کرات یا منگول یعنی ہندوستان کے منگول لوگ آریاؤں سے پہلے ہی ہندوستان آئے تھے۔ مشرقی اور شمال مشرقی ہندوستان کی ہندو تاریخ اور تہذیب کے ارتقا میں ان کا بڑا ہاتھ ہے۔ لیکن چونکہ یہ اس علاقہ تک محدود رہے ، لہٰذا ان کے نام اور اثرات ہندوستان گیر نہ ہوسکے۔ آج بھی اس لسانی خاندان کی زبانیں ہندوستان کے شمال مشرقی علاقوں میں بولی جاتی ہیں۔
ہند آریائی تہذیب
ہندوستان میں ہند آریائی تہذیب کی تاریخ بہت پرانی ہے۔ اس تہذیب کی ابتدا 1500 ق م اس وقت شروع ہوئی جب آریائی نسل کے لوگ پہلی بار وسطی ایشیا کے علاقے سے ہندوستان میں داخل ہوئے اور اپنے ساتھ ایک ایسی زبان لائے جسے سنسکرت کا نام دیا گیا۔ گویا آج سے تقریباً 3000سال قبل ہندوستان میں سنسکرت زبان بولی جاتی تھی۔ جس نے دھیرے دھیرے پراکرت کا روپ اختیار کیا۔ یہی پراکرت، اپ بھرنش کی شکل میں نمودار ہوئی۔ اپ بھرنش کے دور کے بعد جدید ہند آرائی زبانوں کا ارتقا شروع ہوتا ہے۔
آریاؤں کی آمد
ہندوستان میں آریاؤں کی آمد کا سلسلہ، تاریخ کا بہت پرانا واقعہ ہے۔ لہٰذا اس سلسلے میں کوئی حتمی رائے دینا خطرے سے خالی نہیں۔ لیکن یہ بات بعید از امکان معلوم ہوتی ہے کہ اس واقعہ کو 2000قبل مسیح کے زمانے سے منسوب کیا جائے ۔ بعض ماہرین کا خیال تو یہ ہے کہ یہ بات اور بھی بعد کی ہوسکتی ہے۔ اس سے اندازہ ہوتا ہے کہ ہندوستان میں آریاؤں کی آمد کے متعلق کوئی حتمی رائے قائم کرنا دشوار ہے۔ کسی بھی غلط فہمی سے بچنے اور ہندوستان میں آریاؤں کی آمد کی تاریخ کو بخوبی سمجھنے کے لیے ہندوستان کی تاریخ کو عالمی تاریخ کا ایک حصہ ماننا پڑے گا، جو بالخصوص مشرق قریب کے ساتھ گہرا تعلق رکھتی ہے۔ ہمیں یہ معلوم ہے کہ عہد قدیم کی مہذب قوموں سے آریاؤں کا سابقہ 2000 قبل مسیح سے پہلے نہیں ہوا تو ہندوستان میں آریاؤں کی آمد کو اس سے بھی زیادہ قدیم بتانا بالکل غیر تاریخی بات ہوگی ۔ بہر کیف مذہبی جذباتیت کی بنا پر ہندوستان میں آریاؤں کی آمد کی متعین تاریخ بتانا ناممکن محسوس ہوتا ہے۔ لیکن پھر بھی اندازہ یہ ہے کہ آریاؤں کے پہلے گروہوں کی پنجاب میں آمد کا زمانہ 1500 ق م کے قریب رہا ہوگا ۔ جب آریا ہندوستان آئے تو یہ ملک آباد تھا اس میں بعض ایسی نسلیں یا قو میں ( دراوڈ ، منڈا، تبتی برمی) آباد تھیں جو تمدن کی بلندیوں تک پہنچ چکی تھیں۔ جب پہلی بار یہ نظریہ پیش کیا گیا کہ قبل تاریخ مسیح میں آریائی نسل کے لوگ ہندوستان پرحملہ آور ہوئے تو ہندوستان کے تعلیم یافتہ طبقے نے اسے بخوشی اور بآسانی قبول کرلیا کیونکہ آریاؤں کے حملے کے نظریے سے ان کی خود پسندی کو ٹھیس نہیں لگتی تھی اور وہ خود کو وسطی ایشیا سے آنے والے ان سفید فام مہذب آریائی فاتحوں کا وارث سمجھتے تھے جو غیر آرپائی سیاہ فام لوگوں کی سرزمین پر تمدن کی روشنی لے کر آئے تھے۔ نیز وہ یہ بھی محسوں کرتے تھے کہ آریائی یعنی ہند یورپی زبانیں بولنے والی اقوام کے ساتھ ان کا رشتہ ہے۔ انگریز مورخین اور ماہرین لسانیات اور ہندوستان میں دوسرے لوگوں نے بھی اس نظریے کو پسندیدگی کی نظر سے دیکھا اور ’ہمارے آریائی بھائی‘ کہہ کر ہندوستانیوں کی سر پرستی کی ۔ ہندوستان کے تعلیم یافتہ طبقے نے اس نظریے کو اتنی آسانی سے ایک تو اس لیے قبول کر لیا کہ ان کے ذہن جامد اصولوں سے آزادی حاصل کرنے اور کسی بھی معقول معلوم ہونے والے نظریے کو ماننے کے لیے تیار تھے۔ دوسرے ان نچلے درجے کے لوگوں پر فوقیت و برتری کا احساس بھی اس کا سبب تھا جو ذات پات کے فرق اور تہذیب کی اس رنگارنگی سے پیدا ہوئے تھے جس نے آبادی کے اجزائے ترکیبی کو ایک متحد جماعت نہیں بننے دیا تھا۔ کچھ وہ احساس کمتری بھی اس کا سبب بنا جو یورپی اقوام کے ہاتھوں بعض بڑے معاملات میں شکست کی وجہ سے پیدا ہوا تھا۔ بہر کیف اندازہ یہ ہے کہ آریائی نسل کے لوگ ہندوستان میں آمد کے وقت اپنی آریائی زبان بولتے تھے اور دیوتاؤں کے اور اپنے سور ماؤں کی تعریف کے گیت اسی زبان میں گاتے تھے ۔ یہی ہند آریائی زبان وادب کی تاریخ کا نقطہ آغاز تھا۔
لیکن اس کا یہ مفہوم نہیں کہ ہندوستانی تمدن کی تشکیل میں غیر آریاؤں کا کوئی حصہ نہ تھا۔ حقیقت تو یہ ہے کہ اس دور میں ہندوستان کی ترقی میں غیر آریائی لوگوں کا بھی حصہ تھا بلکہ بڑاحصہ تھا۔ شہروں میں بسنے والے غیر آریائی لوگوں کے سامنے آریہ محض خانہ بدوش وحشی تھے اور ملک کے بعض حصوں میں غیر آریہ ، آریاؤں سے کہیں زیادہ ترقی یافتہ اور مادی تمدن کے حامل تھے۔ یہ بات اب واضح ہوتی جارہی ہے کہ ہندوستانی تمدن کے تانے بانے میں غیر آریاؤں کا حصہ کہیں زیادہ ہے اور ہندوستان کی مذہبی و تہذیبی روایات نیز قدیم تاریخ اور داستانوں کا بڑا حصہ غیرآریائی ہے جسے آریائی زبان میں منتقل کر دیا گیا اور اس کی وجہ صرف یہ ہے کہ ایک عرصہ سے آریائی زبان سنسکرت کو فوقیت حاصل ہے۔ اگر چہ غیر ہند آریائی عناصر بھی اس میں گھل مل گئے ۔ مثال کے طور پر ہند و پوجا کی رسم ، اور ہندو مذہب و فکر کی اور بہت سی چیزیں غیر آریائی نظر آئیں گی۔ پرانوں اور رزمیہ داستانوں کا ایک بڑا حصہ اور نیم تاریخی واقعات قبل آریائی ہیں۔ ہماری مادی تہذیب اور معمولات کا ایک بڑا حصہ مثلاً ہمارے بعض اہم پودوں (جیسے چاول ) سبزیوں اور پھلوں جیسے املی اور ناریل وغیر کی کاشت، ہندو زندگی اور ہندو رسوم میں پان یا ناریل کا استعمال، اور عوامی مذہب کا بیشتر حصہ غیر آریاؤں کی دین ہے۔ عوامی دست کاری کے طریقے بھی غیر آریائی ہیں۔
ہند آرائی بولیاں
آریاؤں کی ہندوستان میں آمد تک ’ آریائی ‘یا ’ہند ایرانی‘ بولیاں، ابتدائی ہند یورپی زبان یعنیProto Indo Iranian زبان سے دو منازل آگے بڑھ چکی تھیں۔ ’ہند ایرانی‘ لسانی خاندان در حقیقت غیر منقسم ’ہند یورپی‘ لسانی خاندان کی ایک ذیلی شاخ ہے، اس کی متعین صوتی اور لفظی خصوصیات ہندوستان میں آریاؤں کی آمد کے بعد ’ہند آریائی‘ بولی میں محفوظ رہ گئیں۔ ایک عام خیال یہ ہے کہ ہند ایرانی منزل تقریباً 2000 ق م میں شروع ہوگئی تھی ۔ اپنی تاریخ کی اس دوسری منزل میں ہند یورپی ہمیں 1400 ق م تک میسو پوٹامیا کی متنی (Mitanni) اور دوسری قوموں میں نظر آتی ہے یہ آریائی زبان تھی جو اس منزل میں ایران پہنچی۔ یہ کہنا ذرا مشکل ہے کہ اس زبان میں آریائی نغموں کی ترقی یافتہ شکل کب قابل اعتنا ہو گئی۔ لیکن قدیم متن میں آریائی دیوتاؤں مترا، ورونا، اندرا، ناستیا کے نام اور بابل کے آریائی فاتحین قصبوں (Kassites) میں سوریہ کا نام اس بات کی تائید کرتے ہیں کہ ان دیوتاؤں اور دوسرے آریائی دیوتاؤں کے بھجن میسوپوٹامیا میں ٹھہرنے والے آریائی قبیلوں کے علم میں تھے ۔ یہ بات بہر طور طے ہے کہ ’گائتری‘ اور بعض دوسری بحروں کا ارتقا ایران میں ہوا یا شاید اس سے بھی پہلے میسو پوٹا میا میں اس کی ابتدا ہو چکی تھی۔ ہند یورپی کی مختلف زبانوں کے بعض کتبے اور فقرے جو بظاہر موزوں معلوم ہوتے ہیں اس بات کی تائید کرتے ہیں کہ ہند یورپی لوگ کسی نہ کسی زمانے میں شاعری سے ضرور واقف تھے۔ بعض ماہرین لسانیات نے ویدی کلام کا یونانی ڈرامے سے مقابلہ کر کے ان کی شعر گوئی کی نوعیت معلوم کرنے کی کوشش کی ہے اور اس کوشش میں وہ اس نتیجے پر پہنچتے ہیں کہ یہ شعر گوئی ہونانی اختراع معلوم ہوتی ہے۔ مشہور ماہر لسانیات ایس کے چڑجی کا خیال ہے کہ سنسکرت (ویدی) اوستائی، قدیم نورس (Old Norse) قدیم آئرستانی(Old Irish) اور ابتدائی لتھوانی شاعری سے معلوم ہوتا ہے کہ ہند یورپی نظم گوئی ہومر کے مسلسل مسدسی انداز پر نہیں تھی بلکہ اس پر ہند آریائی اثرات نظر آتے ہیں۔ ویدوں کی زبان سے ظاہر ہوتا ہے کہ ابتدائی ہندی یورپی روایت کے تسلسل کے نتیجے میں آریائی نظم بھی بندوں میں ہی لکھی جاتی تھی۔ اس کی وضاحت کے لیے وہ مزید کہتے ہیں کہ ایسا معلوم ہوتا ہے کہ آریاؤں نے اسور بابلی تہذیب کے بعض عناصر اختیار کر لیے۔ مثلاً نشانات شاہی میں چھتر کا استعمال، بعض تعمیری اور آرائشی تفصیلات جو بہار کے ترہت علاقے اور مدھیہ پردیش کے سانچی کے فن میں نظر آتی ہیں، جس میں قدیم ہندوستانی لکڑی کے فن کو مغربی ایشیائی خصوصیات کے ساتھ پتھر میں منتقل کردیا گیا۔ بعض اسور بابلی الفاظ جو آریاؤں نے اختیار کرلیے تھے ویدی زبان میں ملتے ہیں مثلاً لفظ منا (mana) ’ایک پیمانہ‘ جو سامی منہ (minah) سے لیا گیا ہے۔ بال گنگادھر تلک نے دکھایا تھا کہ کس طرح بابلی روایتوں میں مذکور سانپوں کے نام ذرا سی تبدیلی کے ساتھ اتھروید میں راہ پاگئے ہیں۔
آریاؤں کی اصل جماعت کچھ دن ایران میں رہی پھر ان کے قبائل دو گروہوں میں تقسیم ہو گئے ۔ آج یہ بتانا دشوار ہے کہ اس تقسیم کی بنیاد کس حد تک قبائلی اختلافات پر تھی اور کس حد تک مذہبی اختلافات پر لیکن یہ ایک حقیقت ہے کہ آریا نسل کے لوگ دو گروہوں میں تقسیم ہو گئے ۔ ایک دیو کے پجاری تھے اور دوسرے ’اسور‘ یا ’اہور‘ (Asura/Ahura) کے۔ بہر صورت دیو کے پجاری آریاؤں نے ہندوستان میں ترقی شروع کی۔ آریاؤں کو اس سفر میں شاید مشرقی ایران کے داس دسیو (Dasa-Dasyu) کے لوگوں سے پنجاب کے علاقے میں جنگ کر کے اپنا راستہ بنانا پڑا۔ جب آریا مشرقی ایران کے داس دسیو سے جنگ کرتے ہوئے افغانستان کی سطح مرتفع اور ہند افغانی دروں سے گزر کر و پنجاب کے میدانوں میں داخل ہوئے تو ملک کے اصلی باشندوں سے ان کا پہلا سابقہ جنگ کی صورت میں پڑا۔ یہی وجہ ہے کہ پنجاب ، ہندوستان میں آریاؤں کا مرکز بن گیا اور اس طرح وہ غیر آریاؤں سے اپنا رشتہ استوار کرنے لگے۔ غیر آریائی لوگوں سے ربط اور ارتقا کے فطری تقاضوں سے آریائی زبان میں بھی تبدیلیاں آئیں۔ دھیرے دھیرے یہ آریائی ہند ایرانی شکل سے ہند آریائی میں تبدیل ہوگئی جس کی ابتدائی شکل کی نمائندگی رگ وید میں ہوتی ہے۔
رِگ وید
رگ یاسک و ید ایک ایسی مقدس کتاب ہے جس کی تشریح کی کوششیں ہزاروں سال سے ہوتی چلی آرہی ہیں لیکن آج تک اس کی مکمل اور صحیح تشریح نہیں ہو پائی ہے۔ رگ وید کی تشریح کے سلسلے میں شارح ’یاسک‘ (تقریباً 500 ق م) کا نام سر فہرست آتا ہے جس نے رگ وید کے چند اشعار کی شرح لکھنے کی کوشش کی ۔ یہ صحیح ہے کہ یا سک ہی رگ وید کا پہلا شارح نہیں ہے اس لیے کہ اس کی شرح سے چند دوسرے شارحین کے نام بھی ہم تک پہنچے ہیں جو اس سے پیشتر گزر چکے ہیں۔ لیکن ان کی تشریحات محفوظ نہیں رہ سکیں البتہ ان کے متعلق تھوڑی بہت معلومات ہم کو یا سک کی شرح ہی سے حاصل ہوتی ہیں۔ ان میں سے ’کوتس‘ نامی ایک شارح نے تو رگ وید کو بالکل ہی مہمل قرار دے دیا ہے اور مہملات رگ وید کی مثال میں چند الفاظ بھی لکھے ہیں جیسے امیک، یاد ومگن، جاریائی کا نسکا، وغیرہ یا سک نے اپنی شرح میں رگ وید کے اہمال سے تو انکار کیا ہے البتہ ایک ایک لفظ کے اشتقاق میں کتنی ہی متبادل تجویزیں پیش کرنے کے بعد اسے بھی کچھ الفاظ کا مطلب سمجھنے میں اپنی نارسائی کا اعتراف کرنا پڑا اور ’کوتس‘ کے مہملات کی فہرست میں چند اور الفاظ مثلاً دروی ہومی، ورتتی، دمونا ، جاٹیہ ، آٹنار، جا گروک وغیرہ کا اضافہ کرنا پڑا۔ نارسائی و کم فہمی کا یہ سلسلہ اس وقت سے آج تک برابر جاری ہے جو دیسی اور بدیسی شارحین کے یہاں دیکھا جاسکتا ہے۔
تشریح ’رگ وید‘ میں ان دقتوں اور دشواریوں کے دو خاص اسباب ہیں ۔ اول یہ کہ اس ایک کتاب میں دو سو سے زیادہ شاعروں کے بھجن شامل ہیں اور یہ شعرا ہندوستان کے مختلف علاقوں کے رہنے بسنے والے تھے بلکہ ان میں سے کچھ تو ایک ہی خاندان کی تین تین پشتوں سے تعلق رکھتے تھے۔ مکان و زمان کے اس تفاوت کے ساتھ انھوں نے اپنے بھجنوں میں ایرانی زبان کے علاوہ اپنے علاقوں کی رائج الوقت زبانیں بھی استعمال کی ہیں اور یوں رگ وید میں اتنی زبانوں کے نمونے جمع ہو گئے ہیں کہ اس کا مکمل طور پر سمجھ لینا کسی ایک شخص کے بس کی بات نہیں ہے۔یہی وجہ ہے کہ اس کے شارحین جگہ جگہ رکتے اور قدم قدم پر لڑکھڑاتے ہیں اور آخر میں اپنی ناکامی کا اعلان کرنے پر مجبور ہو جاتے ہیں۔
دیسی شارحین و یدک زبان کو ’دیووانی‘ سمجھنے کے باعث کبھی یہ تصور بھلا نہیں سکے کہ اس پاک اور مقدس زبان میں آریوں کی آبائی زبان قدیم کے ساتھ ساتھ غیر آریائی زبانوں کا پٹ بھی شامل ہو سکتا ہے اور بعض ماہرین لسانیات بھی مفروضہ قدیم ہند یورپی زبان سے اپنے فطری تعلق خاطر کی بنا پر رگ وید کے دیسی جزو پر اچھی طرح دھیان نہیں دے سکے ۔ غرض رگ وید کی تشریح میں اس کی لسانی رنگا رنگی ہمیشہ سے سد راہ رہی ہے جس سے بعض مقامات پر یہ الجھن بھی پیدا ہو جاتی ہے کہ دو زبانوں کے ہم آواز لفظوں کو دیکھ کر ان کے اشتقاق اور معنوی اختلاف کے با وجود بعض محققین ایک زبان کو دوسری سے مشتق سمجھنے لگے ہیں ۔ مثال کے طور پر بعض لوگ ’ہم‘ (پراکرت اسھ)کو سنسکرت ’اہم‘ (معنی میں) سے یہ کہہ کر نکالتے ہیں کہ سنسکرت لفظ کا الف گر گیا ہے، جب کہ حقیقت یہ ہے کہ سنسکرت لفظ ’اہم‘ کا تلفظ اوستا میں ’ازم‘ اور فارسی قدیم میں ’اوم‘ ہوتا ہے، اور پھر وہ ضرورت اور وہ وجہ بھی نہیں بتاتے جو اس کے سقوط کا تلفظ بالکل اسی سہولت کے ساتھ کرتے چلے آ رہے ہیں جس آسانی سے درمیانی یا آخری الف کو بولتے رہتے ہیں۔ یعنی وہ لوگ ابتدائی الف کے تلفظ پر پوری طرح قادر ہیں۔ اس کے علاوہ یہ مسلمہ امر ہے کہ زبانوں سے آوازیں اس طرح کبھی نہیں اُتر تیں جس طرح کاغذ سے حرف مٹائے، اُڑائے، کاٹے یا بگاڑے جاتے ہیں۔ رگ وید کی تشریحی دشواری کا دوسرا سبب اس کی کتابت کا وہ اصول ہے جسے لسانیات میں تبادل حروف کا نام دیا گیا ہے اور یہ سبب پہلے سے بھی زیادہ اہم ہے۔ بعض اوقات رگ وید میں دو مختلف التلفظ اور مختلف المعنی الفاظ ایک ہی مکتوبی شکل میں نظر آتے ہیں۔ مثلاً اس میں ایک لفظ ’دکش‘ ملتا ہے جس کا ایک مقام پر ایرانی تلفظ ’دش‘ (عبادت کرنا) ہے اور دوسرے مقام پر ہندوستانی تلفظ لا کھ (سو ہزار) ہے۔ اب یہ بات کہ کسی مقام پر ویدک ’مرگ ‘ جسے کلاسیکی سنسکرت میں عام طور پر ہرن کے معنوں میں استعمال کیا جاتا ہے فارسی لفظ ’ مرغ‘ کی مکتوبی شکل ہے لیکن دوسرے مقام پر فارسی لفظ ’مرگ‘ (موت) کی۔ اب یہ شارحین کی بے بسی ہے کہ موت کے مفہوم میں جہاں اس کے خوف کا بیان ہوا ہے وہ لوگ ’مرگ‘ کے معنی ’شیر‘ لکھ کر تشریح کی خانہ پری کردیتے ہیں۔
باب کا خلاصہ
1 ہندوستان میں ہند آریائی، دراوڑ، منڈا اور تبتی برمی خاندان کی زبانیں بولی جاتی ہیں۔
2 دراویدی تہذیب کی ابتدا موہن جوداڑو، سندھ اور پنجاب کی قبل آریائی تہذیب سے ہوتی ہے۔ موہن جوداڑو اور ہڑپا رسم الخط، مغربی اور ہندوستانی براہمی سے اس کی مشابہت، دراویدی تہذیب کی عظمت کا احساس دلاتی ہیں۔ دراویدی تہذیب ایک قدیم تہذیب ہے۔
3 ہند آریائی زبانوں نے دراویدی زبانوں کے لسانی اثرات کو قبول کیا اور دراویدی زبانوں کے زیراثر اس میں کئی ایسی لسانی خصوصیات پیدا ہوگئیں جو دراویدی تھیں۔
4 منڈالوگ سادہ زندگی بسر کرتے ہیں۔ چھوٹی چھوٹی بستیوں میں رہتے ہیںا ور معمولی کاشت کاری کرتے ہیں۔ اس نسل کے لوگ جنھیں عام طور سے ’آدی واسی‘ کہا جاتا ہے، آج بھی جھارکھنڈ اور چھتیس گڑھ کے علاقے میں رہتے ہیں اور منڈا لسانی خاندان کی زبانیں بولتے ہیں۔
5 ایک عام خیال یہ ہے کہ کرات یا منگول یعنی ہندوستان کے منگول لوگ آریاؤں سے پہلے ہی ہندوستان آئے تھے۔ آج بھی اس لسانی خاندان کی زبانیں ہندوستان کی شمال مشرقی علاقوں میں بول جاتی ہیں۔
6 ہندوستان میں ہند آریائی تہذیب کی تاریخ بہت پرانی ہے۔ اس تاریخ کی ابتدا 1500 ق م اس وقت شروع ہوئی جب آریائی نسل کے لوگ پہلی بار وسطی ایشیا کے علاقے سے ہندوستان میں داخل ہوئے اور اپنے ساتھ ایک ایسی زبان لائے جسے سنسکرت کا نام دیا گیا۔