غالب۔۔۔۔حیات نو کا استعارہ،مضمون نگار:ریاض احمد

غالب۔۔۔۔حیات نو کا استعارہ،مضمون نگار:ریاض احمد

September 9, 2026 content 0 Comments 0 tags

اردو دنیا،ستمبر2026:

قطرے کے گہر ہونے کا سفر، عناصر میں اعتدال کا نہ ہونا یا رو میں ہے رخشِ عمر کہاں دیکھئے تھمے یاہوتا ہے شب و روز تماشا میرے آگے۔ یہ تمام زندگی کے مختلف مراحل ہیں جن سے گزر کر انسانی زندگی کی مسافت طے ہوتی ہے۔ انسان کو نہ چاہتے ہوئے بھی ان حالات و واقعات اور حوادث سے نبرد آزما ہونا پڑتا ہے۔ ان سوالات پر بحث و تمحیص کا سلسلہ جاری و ساری ہے غالب اس موضوع سے کیسے چشم پوشی کر سکتے ہیں، انھوں نے اپنی شاعری میں حیات انسانی کے کسی بھی پہلو کو نہیں چھوڑا ہے۔ بقول عبد الرحمان بجنوری:
’’لوح سے تمت تک مشکل سے سو صفحے ہیں لیکن کیا ہے جو یاں حاضر نہیں کون سا نغمہ ہے جو اس سازِ زندگی کے تاروں میں بیدار یا خوابیدہ موجود نہیں‘‘1
وہ زندگی کے نباض ہیں۔ انھوں نے ہمیں زندگی جینے کا سلیقہ سکھایا خواہشات کے سہارے زندگیوں کو منور کرنے کی ترغیب دے کر زندگی کی منزل کا تعین خود کرنے کے لیے آمادہ کیا۔ وہ راہِ زندگی کے رہرو نظر آتے ہیں۔ ان کے خیال میں زندگی حادثوں سے تو بھری ہوئی ہوتی ہے مگر پے در پے حادثات کے باوجود بھی انسانی زندگی میں لاکھوں تمنائیں دائم الحبس کی صورت میں دل کے نہاں خانہ میں پوشدہ ہیں۔ اس لیے دل میں آرزو کا سفر ختم نہیں ہوتا۔ ایک آرزو پوری ہو جائے تو دوسری آرزو کی منزل روشنی کے مینار کی طرح دور سے دکھائی دے۔ جس کی طرف انسان بڑھتا رہے، کیونکہ دل ہمیشہ تمناؤں کی نئی منزلوں کا خواہاں رہتا ہے، وہ دائمی حرکت چاہتا ہے۔ غالب دریافت کرتے ہیں کہ جب دشت امکان نقش پا کے مثل ہیں تو اب دیکھو تمنا اپنا دوسرا قدم کدھر اٹھاتی ہے کیونکہ ہر انسان اپنی فطرت کی تکمیل کے لیے ضروری سمجھتا ہے کہ نئے نئے مقاصد پیدا کرتا رہے۔ اس طرح وہ انسان کو کشمکش کائنات میں بے بس دیکھنا نہیں چاہتا، بلکہ نت نئے تجربوں سے آشنا کرنے کی کوشش میں ہے۔ تمنّا کی آزادی کا ایک وصف یہ ہے کہ وہ انسان کو اپنی طرف سے پہل کرنے کا موقع فراہم کر دیتی ہے۔ انسان ہمیشہ خوب سے خوب ترکی تلاش میں سرگرداں رہا ہے۔ اس کے سفر کی جو منزلیں طے ہو چکیں وہ طے ہو چکیں اب وہ پلٹ کر ان کی طرف نہیں دیکھنا چاہتا۔ جب کہ انھیںماضی سے بے حد لگائو تھا۔ماضی کی شاندار روایات اور اقدار ان کے لہو میں بسی ہوئی ہیں، وہ تہذیب رفتہ کے ماتم گسار بھی ہیں اور ان کو رنگارنگ بزم آرائیاں اور بادہ شبانہ کی سرمستیاں یاد بھی ہیں۔لیکن وہ کبھی بھی جذباتی نہیں ہونے پاتے۔ ماضی کی تاریخ سے بھی اپنا رشتہ منقطع نہیں کر سکتا کیونکہ ماضی حال کا زینہ ہوتاہے۔ ہر زمانے میں انسان نے اپنی ذات سے ماورا ہو کر نئے احوال کی تخلیق کی ہے اگر ایسا نہ ہو تو زندگی قطعی طور پر ہمیشہ کے لیے پابند ہو جاتی ہے اور انسان عالم تکوین کے مذاق کا تختہ مشق بن جاتا ہے اور وہ وہاں ہرگز نہ پہنچ سکتا جہاں آج ہم اس کو دیکھ رہے ہیں۔ اسی لیے اپنی تخلیقی صلاحیتوں کو بروئے کار لانے کے لیے غالب انسان کو ایسے ایسے حیرت انگیز بیابانوں میں لے جانے کے لیے سرگرداں رہتا ہے، جن کے راستوں کو خود تحیر نے اپنے ہاتھوں سے بنایا ہے کیونکہ کائنات کا ہر ذرہ تبدیلی اور انقلاب کی حالت میں ہے جو کچھ ہوتا ہے وہ قانون قدرت کے مطابق ہوتا ہے۔ اس لیے انسان کو ہر وقت اپنے آپ کو زمانے کے مطابق ڈھالنا چاہیے کیونکہ یہاں کسی شے کو ثبات نہیں بقول غالب
خوشی خوشی کو نہ کہہ ‘غم کو غم نہ جان اسد
قرار داخل اجزائے کائنات نہیں
قرار داخل اجزائے کائنات یا عمر طبیعی سے بہتر ہی سہی لیکن اس کا کیا اعتبار کہ میں عمر طبیعی کو ضرور پہنچ جاؤں گا غالب زندگی کی آفات و حوادث کو مدنظر رکھتے ہوئے بنی نوع انسان کو اس بات کی ترغیب دیتا ہے کہ ہوس کو ہے نشاط کار کیا کیا، نہ ہو مرنا تو جینے کا مزہ کیا کے باوجود بھی انسان کو اپنی زندگی میں مقصد کو مدنظر رکھنا چاہیے کہ :
منظر اک بلندی پر اور ہم بنا سکتے
عرش سے ادھر ہوتا کاش کہ مقام اپنا
غالب اصل میں انسان کی منزل مقصود کی طلب کو بڑھاوا دینے میں خار دار راہوں سے آشکار کرنے کی کوشش کرتا ہے۔ وہ راہ کو پرخار دیکھ کر خوش ہوتے ہیں کیونکہ زندگی میں مختلف حیرت انگیز بیابانوں سے گزرنا پڑتا ہے لیکن مقاصد کی لگن یا آرزو مندی کی نیرنگِ تمنا ہی ان تمام کیفیتوں کو اپنے حلقہ دام میں لے سکتی ہیں جو زندان میں بھی صحرا نوردی سے باز نہیں رکھتا، لیلا کے اشاروں پر مجنوں کو بیابان نوردی پر آمادہ کرتی ہے۔ میخانے میں ساغر کو گردش میں رکھ رہی ہے۔ دل کے ہر حصے کو تمنا کا گھائل بنا دیتی ہے،جس سے اس کے ریشے ریشے میں حرکت دائمی نظر آتی ہے، کیونکہ اس آفت کے ٹکڑے کو عافیت سے نفرت اور دائمی آوارگی سے محبت ہے۔ وہ زندگی میں طوفانوں سے پنجہ کشی کرنے کا خیر مقدم کرتی ہے۔ باد مخالف کشتی بے لنگر اور ناخدا غفلت کی حالت میں اپنی ذات کے وسائل پر بھروسہ کر کے راستے کا سراغ لگانے پر آمادہ کرتی ہے۔ گردش ساغر کو صدجلوئہ رنگیں میں متبدل کر دیتا ہے۔ وہ دنیا کی ہر شے کو تمنا کی حوصلہ مندی اور ہمت عالی سے خریدنے کی کوشش کرتا ہے اور خود ان کا کسی قیمت پر سودا کرنے کو تیار نظر نہیں آتے۔ وہ کہتے ہیں کہ انسانی تمنائوں سے ہی شور ہستی برپا ہے۔ گویا خود محشر قیامت اس مشت خاک کے اندر پنہاں ہے۔ غالب کے نزدیک انسان کا سینہ تخلیق آرزو اور تخلیق مقاصد کی شعاعوں سے منور ہے۔ کائنات میں انسان کی تخلیق کا ایک خاص مقصد ہے۔ اس راز کو کائنات کے قرب و جوار میں آشکار کرنے کے لیے بلند مقاصد اور جرأت و ہمت کی اشد ضرورت ہے تاکہ زندگی کا قافلہ آگے بڑھتا رہے۔ وہ ذوق طلب اور سوزِ آرزو کو اولیں مقصد گردانتے ہیں۔ دریائوں کو عبور کرنا کوہِ گراں اور طلسم زمان ومکاں کی حدبندی کے حصاروں کو توڑ کر جہان بے نمود میں بیشمار نئے عالم آشکار کی تلاش میں سرگرم نظر آتے ہیں۔ ان کے نزدیک حقیقی زندگی کی اصل جستجو اور آرزو میں پوشیدہ ہے وہ اس عالم رنگ و بو کی گہما گہمی’چہل پہل‘ ترقی کے سارے منازل اور تمام اسباب و علل کو اسی کے بدولت معرض وجود میں گردانتے ہیں۔ وہ اس سے ہمیں تاروں پر کمند ڈالنا سکھاتے ہیں اور زندگی کو حرکت و اضطراب کا ضامن بنا دیتے ہیں۔ ان کے یہاں جو سکون و ثبات نظر آتا ہے یہ تودھوکے کے سوائے کچھ نہیں، اس لیے کہ فی الواقع حرکت ہی حقیقی زندگی ہے۔ لیکن امر واقع یہ ہے کہ کائنات کا ہر ذرہ اضطراب سے دوچار ہے اور حرکت سے ہی انسانی وجود متحرک رہتا ہے اور مختلف جہتوں سے ہم کنار رہتا ہے۔ اے انسان تو اب بھی زندگی کو ایک ایسا راز تصور کرتا ہے جبکہ زندگی تو بلند پروازی اور عروج و ارتقا سے عبارت ہے اس میں پست وبلند بہت آتے ہیں مگر اس سے تو منزل تک رسائی سے زیادہ سفر اور گردش پسند ہے جہاں تک سفر کا تعلق ہے سو وہ زندگی کو متحرک اور بر سر عمل رکھنے کا دوسرا نام ہے، اس لیے سفر کو ایک حقیقت بھی تصور کر لینا چاہیے اور مجاز بھی۔سفر کی دونوں صورتیں زندگی کے لیے بلا شبہ دورخ ہیں۔ ان دونوں رویوں میں زندگی علاج درد میں بھی درد کی لذت کا ساماں مہیا کرتی ہے۔ جس سے زندگی میں پلٹنا جھپٹنا اور بھڑکنے کا کاروان زندہ وتا بندہ رہتا ہے۔ یہ زمانے کے دھارے کو اپنے آپ میں گم کرنے کی کوشش کرتا ہے اور ستم زدہ موجوں کے تھپیڑوں کو سہنے کے لیے آمادہ کرتا ہے۔ غالب اسی حرکت و عمل‘مسلسل جہدِ عمل سے جہاں بینمود کی تخلیق کا راز جاننے کی کوشش کرتا ہے۔ وہ یم زندگی اور رم زندگی میں اس حقیقت کو پا لیتا ہے۔ وہ انسان کو اس عالم رنگ و بو جس کی حدیں ردائے نیلگوں تک نظر آتی ہیں پر قناعت کرنے کے بجائے جہاں اور کی تلاش میں سرگرداں دیکھنا چاہتا ہے۔ چونکہ اس فضا میں سینکڑوں کارواں کی طناب کا سراغ مل رہا ہے جو وقتاً فوقتاً ابھرتی اور مٹتی جا رہی تھی۔ اس لیے انسان کو زندگی کے سفر میں کوئی نشیمن میں مستقل طور پر تعمیر نہیں کرنا چاہیے یہاں زندگی روز و شب اور صبح و شام سے تعبیر ہے۔
وہ فراق اور وہ وصال کہاں
وہ شب وروز ماہ و سال کہاں
اس جہاں میں جنبش ازل سے ہی شہب زمانہ کی طرف دوڑتا رہتا ہے۔ جس کا آغاز ستاروں سے آگے جہاں اور بھی ہیں ابھی عشق کے امتحاں اور بھی ہیں کی تشکک پسندی میں ہے، جس کی حقیقت خاراشگافی اور سخت کوشی میں چھپا ہوئی ہے۔ جہاں چھالوں میں کانٹے لگے ہوئے ہیں زندگی تگاپوئے د مادم کی دلیل ہے، جو حقیقت زندگی کا راز ہے۔ اس ذوق میں وہ راحت طلبی اپنے لیے مضر رساں تصور کرتے ہیں۔ یہاں تک کہ جنت کو بھی عافیت اور دلکشی کے لیے در خور اعتنا نہیں سمجھتے دوزخ میں ڈال دو کوئی لیکر بہشت کو ’سیر کے واسطے تھوڑی سی فضا اور سہی یا کشاکش ہستی سے کرے کیا سعی آزادی‘ ہوئی زنجیریں موجِ آب کو فرصت روانی کے مصداق ہیں۔ غالب اسی مسلسل کشاکش کو زندگی کا ثمر آور پوداسمجھتے ہیں، جس سے گلستاں میں نئے گل بوٹے پیدا ہو سکتے ہیں۔ اس کی حیثیت چمن میں باغبان جیسی ہے جو ہر روز اس گلستان میں رنگ بہ رنگ پھولوں کے جھرمٹ دیکھنے کا خواہاں رہتا ہے یہ خواہش ہر روز ایک نئی آن بان کے ساتھ نظر آتی ہے:
ہزاروں خواہشیں ایسی کہ ہر خواہش پہ دم نکلے
بہت نکلے میرے ارمان لیکن پھر بھی کم نکلے
حسرت بھری دنیا میں انسان کی زندگی امتحان گاہ ہے۔یہاں کسی بھی منزل کا حد آخر نہیں ہوتا ہے۔ ازل سے ابد تک، لحد سے مہد تک وقوع پذیر کا سفر جاری و ساری ہے۔ غالب کشمکش زندگی میں عرش سے کاش کہ ہوتا مکاں اپنا یا لاکھوں ہی آفتاب ہیں اور بے شمار چاند کے متقاضی ہیں۔ کیونکہ کائنات کا ہر ذرہ مسلسل تکمیل کی طرف گامزن ہے۔ رات دن گردش میں ہیں سات آسماں، یا آرائش جمال سے فارغ نہیں ہنوز ہی قلزم ہستی کا اصل راز ہے۔ اس حلقہ دام خیال میں انسانی زندگی کی گردش ساقی کوثر کے باغ میں سوئے زن کا حکم رکھتی ہے۔ وہ دوران سفر کسی مقام کو اپنا منزل قرار نہیں دیتے ہر مقام ان کے لیے چاہے وہ مقام کعبہ ہی کیوں نہ ہو،نقش پائے رواں سے زیادہ اہمیت نہیں رکھتا۔ پارینہ یا کہن نو کے اس سفر میں وہ بنی آدم کو ہمت، عزم، قوت، صبر، استقلال، یقین محکم اور عمل پیہم کی دعوت دیتا ہے ان کی نگاہیں دونوں تہذیب پر جمی ہوئی تھیں وہ مسلسل کوشش کی طرف اپنے قاری کو متوجہ کرتا ہے کیونکہ دمادم کن فیکوں یا کل یوم ہوفی شان کی صورت نمود پر مشتمل ہے۔ غالب زمانے کے بدلتے ہوئے انداز کو صورتِ شمشیر پر دم نکلنے کے مترادف قرار دیتے ہیں۔ اسی لیے غالب ان بکھرے ہوئے حالات میں انسان کو تغیر و تبدیلی سے آشنا ہونے کی تلقین کر رہے ہیں۔ کیونکہ دنیا کی ہر شے انقلاب پذیر ہے ہر چیز ’ہر لمحہ ‘ہر گھڑی تبدیلی ہو رہی ہے جو صورت کل تھی وہ آج نہیں جو آج ہے کل نہ ہوگی کسی چیز کو ثبات نہیں۔ اگر ثبات ہے تو فقط تبدیلی کو۔ وہ آزاد کے بجائے جدوجہد کی پرزور تلقین کرتا ہے۔ تعمیر میں تخریب کا پہلو مضمر ہونا یا عروج و بلندی میں پستی کا پہلو چھپا رہنا قانون قدرت ہے۔کائنات میں زندگی جہاں ہم ہیں وہاں دار و رسن کی آزمائش سے گزر رہے ہیں’ غم عشق گر نہ ہوتا غم روزگار کی آزمائش ابر آلودکی طرح سر پر دکھ رہی ہے۔ رنگارنگ بزم آرائیوں میں نقش طاق نسیاں بھی موجود ہیں۔ سینہ پرخوں کا زنداں خانہ بن چکا ہے طوفان حوادث از مکتب کی صورت میں موجود ہیں‘ کارفرما دو دچراغ اختیار کر چکا ہے۔ زمانے کی ستم ظریفی نے داغ دل کو سر و چراغاں بنا دیا ہے یہاں تک کہ ایک ذرا چھیڑیے تو دیکھئے کیا ہوتا کا عالم چار سو میں نظر آتا ہے۔ غالب ان تمام حالات میں سفرِ زندگی کو جینے کا فن سکھاتا ہے۔ ایک طرف دنیا کو تفکر کا سبق سکھانا اور دوسری طرف خندہ پیشانی سے طوفانِ حوادث کا تماشا دیکھنا ان کی شخصیت کی گھٹی میں پڑا ہوا ہے شب و روز کے نئے کھیل ان کے لیے بازیچہ اطفال کی حیثیت رکھتے ہیں۔
بازیچہ اطفال ہے دنیا مرے آگے
ہوتا ہے شب و روز تماشا مرے آگے
انسان غموں کے بوجھ تلے اپنے قیمتی متاع کو نظر فریب کا شکار بننے کا عادی بن جاتا ہے۔ یہاں تک کہ وہ مرگ ناگہاں کا تصور نکتہ سنج دماغ میں جاناں یار کی صورت میں زانوئے ادب تہہ کر کے ہمت و استقلال کا عامل چھوڑ آتے ہیں۔ جب کہ کار گہہ حیات میں حسین جیساجذبہ اور حیدر کرار کی ہمت کا ہونا لازمی ہے کیونکہ غم اور خوشی انسانی نفسیات کا جزو لاینفک ہیں اور ان دونوں کا تاثر زندگی میں پانی کے بلبلے کی مانند ہے۔ خوشی کا تاثر انسانی زندگی کو کہیں حد تک کابل اور جفاکشی سے محروم کرتا ہے جب کہ غم زندگی کے رگ و پے میں رگ جان کے مانند ہے مرد آزاد منش غالب کے نزدیک غم کا تصور انسانی ذہن میں برق کی روشنی سے ایک لمحے بھی زیادہ نہیں ہوتا۔
غم نہیں ہوتا ہے ا ٓزادوں کو بیش اذ یک نفس
برق سے کرتے ہیں روشن، شمع ماتم خانہ ہم
غالب کائنات کے ہر ذرہ کو آرائش جمال سے فارغ نہیں ہنوز سے تعبیر کرتا ہے، جس میں ذوق وشوق چھپا ہوا ہے۔ وہ بنی نوع انسان کی زیست کو مقدس بنانے کی تلاش میں ہے۔جس طرح نیطشے نے اپنی کتاب المیے کی تخلیق میں لکھا ہے کہ فن کا کمال یہ ہے کہ وہ زیست(existance)کا اقرار کرے اس کو بارحمت تصور کرے اور زیست کو مقدس بنائے۔ غالب نے ہمیشہ کلی انسانی موقف (total human situation)کو اپنے پیش نظر رکھا اس لیے بلندیوں سے پستی اور پستی سے بلندیوں تک سرگرم سفر نظر آتا ہے۔ وہ کائنات کو دام تمنا میں اسیر کر لینا چاہتا ہے ان کے دام تمنا میں وہ بھی اک صید زبوں کی طرح ہیں کیونکہ زیست کے ہر لمحہ میں موت پنہاں ہے۔ اس لیے یہ کائنات انھیں ناقص دکھ رہی ہے جس میں عشق کا کمال ممکن نہیں۔عشق ہی زیست کے بے معنی صحرا میں امید کے چراغ روشن کرتا ہے اور زندگی کی بے معنویت میں معانی کی تخلیق کرتا اور وحشت کدہ عالم میں سکون کا سامان فراہم کرتا ہے۔اس لئے مضمحل ہوگئے قوی غالب کہ عناصر میں اعتدال نہیں ہونے کے باوجودبھی ان کا احتجاج یہ ہے۔
گو ہاتھ کو جنبش نہیں آنکھوں میں تو دم ہے
رہنے دو ابھی ساغر ومینا مرے آگے
حواشی :
1- یادگارِ غالب، الطاف حسین حالی
2- محاسن کلام غالب، عبدالرحمان بجنوری
3- بیان غالب، آغا محمد باقر
4- غالب شخص اور شاعر، مجنوں گورکھ پوری
5- ماہنامہ نقوش کا غالب نمبر، محمد طفیل یادگار کمیٹی ہند کی پیشکش